الفرن العجين

الفرن العجين

ماتخبزوش الشمس فى الفرن العجين

ولا تزرعوش الضى فى عيون العدم

ما تحملوش العمر أوجاع السنين

وما تكتموش أنفاسكوا من ريحة الألم

وماتسحبوش من بين ضلوع النجم فرحُه

دا انا اللى دمع النجم فى العالى بلل خدودى سنين

وانا الل حاضن بين ضلوعه البحر

وعزف الموج على شرايني لحن غريق

وانا اللى فاتح للجراح ميت ألف باب

ما بتعدى

هدِّى يا ولدى خطوتك فوق الهموم هدِّى

وافتح جراحك يا ولدوخلِّى أيامك تشوف

وافتح جراحك يا ولد مانتاش صديق إلا العدم

واضرب على قوس الرحيل تراتيل ميلاد

مليون يهوذابيصلبوا فرحة عنيك

كل اللى بتراهن عليه بايع

إفرد حُمولك ليك وابكى بِحُرقه عليك

يا حُزن ماشى بروح

يا شهقة المدبوح

لِمْ الأسى والنوح

واطلع على النخله

هات لى معاك إنسان

مايكونشى يوم خوَّان

يزرع لى فى البستان

قلب ويكون اخضر

مروى ندى وعنبر

ما حزنشى يوم العيد

أملُه ان بكره جديد

يوعد ما يخْلِفْشى

يبنى الجدار كامل

طوبه على طوبه

والغُّمه منصوبه

بتموت الميت

غنى يا نوَّاره

فى الغيط وفى الحاره

لِمُّوا الكلاب لِمُّوا

طرح الندى شِمّوا

اللى امه قاسيه عليه

راح يعمل إيه دى امه

وان كان ابوه ظالم

يبقى الضلام عمُّه

دمُّه اللى مش طاهر

مطلعش من مدمه

دمعُه اللى سال م الويل

طرطش على كُمُه

يافاطمه إبنك نبى

ماوالسش يوم أجنبى

ما طفاش فرح الصبيه

بدموع فراق الصبى

إبنك فى علم الغيب

لسه هلاله غريب

مانزلش يوم واترفع

أو حتى يوم كان عاش

إبنك يا فاطمه ماجاش !!

________________

سامح عبد الفضيل